Arnar Grétarsson fyrrum þjálfari Vals ræðir uppsögn sína í áhugaverðu viðtali við Chess After Dark þar sem hann ræddi hvað gekk á síðasta sumar.

Arnar var rekinn á hóteli í Skotlandi síðasta sumar og fannst ekki vel staðið að uppsögn hans.

„Eftir leikinn, konan mín Sigrún var með í ferðinni en var á hóteli með stjórnarmönnum Vals fram að leik. Hún kemur með í rútunni upp á hótel eftir leik, svo erum við að labba inn. Hún ætlaði að vera lengur og ég eð fara heim daginn eftir, við förum inn í herbergi,“ segir Arnar þegar hann ræðir þetta örlagaríka kvöld í Skotlandi en liðið hafði þá tapað í Evrópu og dottið úr leik.

„Ég er að ræða við hana, ég ætla að tala við strákana og hvernig ég ætla að nálgast hlutina. Stutt í næsta leik, við erum að labba upp. Styrmir framkvæmdarstjóri kemur og biður mig að tala við sig, þá var herbergi sem við notuðum til funda. Ég kem þar inn, hurðin lokast og Sigrún er fyrir utan. Diddi (Fyrrum framkvæmdarstjóri) og Börkur (Þáverandi formaður) voru þar inni, það var mjög stutt. Ég hélt fyrst að það væri verið að ræða leikinn og tuða yfir því, það var sagt að þetta væri ekki að ganga,“ sagði Arnar um uppsögn sína.

„Það var ekkert við því að segja, á þeim tíma hvað ætlarðu að segja?“

Einhverjir voru á því að Valur hefði getað beðið með það reka Arnar þangað til heim væri komið.

„Þeir voru á því að þetta gæti ekki beðið, það er bara þeirra. Mér fannst þetta ekki skemmtilegt, maður hefur upplifað ýmislegt í fótbolta en þetta er með því leiðinlegasta. Börkur ætlaði að fara inn og tala við hópinn en konan mín sagði við hann hvort að ég ætti ekki að fá að gera það fyrst. Ég fór inn og þakkaði fyrir og óskaði þeim góðs gengis, við vorum á sama hótelinu. Ég talaði við þá og spurði hvort það væri ekki æskilegt að ég ferðaðist heim með konunni seinna, þeir græjuðu það.“

„Maður er ekki að væla og skæla, þetta er leiðinlegt fyrir fjölskylduna. Það var eflaust hægt að gera þetta betur, þeir tóku þessa ákvörðun.“