„Þetta er auðvitað bara æsispennandi og stórskemmtileg staða,“ segir Björn Ingi Hrafnsson, ritstjóri Viljans og fyrrverandi borgarfulltrúi, um þá stöðu sem uppi er í forsetakosningunum. Mjög mjótt er á mununum á milli efstu frambjóðenda ef marka má skoðanakannanir nú þegar aðeins fjórir dagar eru til kosninga.

Björn Ingi fór yfir málið í Reykjavík síðdegis á Bylgjunni í gær.

Samkvæmt nýrri skoðanakönnun Prósents sem gerð var fyrir Morgunblaðið eru þær Halla Hrund Logadóttir, Halla Tómasdóttir og Katrín Jakobsdóttir í einum hnapp á toppnum. Ef niðurstöður kosninganna verða í samræmi við þessa könnun er ljóst að örfá atkvæði geta ráðið úrslitum, svo litlu munar á fylgi frambjóðendanna.

Sjá einnig: Stefnir í æsispennandi kosningar – Fylgi þriggja efstu nánast hnífjafnt

Björn Ingi segir að fleiri kannanir séu væntanlegar í vikunni, til dæmis frá Félagsvísindastofnun, Maskínu og Gallup en þær segi þó ekki alla söguna.

„Fólk getur skipt um skoðun og fólk er enn þá að móta sér skoðun. Sumir frambjóðendur eru þannig að þeir eiga meira kjarnafylgi, fólk er ákveðnara í að kjósa það,“ sagði Björn Ingi sem nefnir svo Höllu Hrund Logadóttur sem stökk upp í könnunum og fór svo niður. Þá hafi Halla Tómasdóttir sótt verulega í sig veðrið að undanförnu.

Björn Ingi segir að sumir vilji kjósa taktískt en við þær aðstæður sem eru uppi núna sé það nánast ómögulegt.

„Það hefði verið auðveldara ef það væri einhver einn aðili sem væri augljós áskorandi við Katrínu en þessi könnun og síðustu kannanir hafa ekki sýnt okkur slíka stöðu. Það eru margir enn þá í myndinni og enn þá mikið sem getur gerst og dreifingin er mjög mikil. Ekki bara að það séu tólf í framboði heldur fimm til sex sem eru að fá talsvert fylgi.“

Björn Ingi var svo spurður út í kosningabaráttuna og hvort við ættum mögulega eftir að sjá einhverjar sprengjur í vikunni.

„Það er ekkert ólíklegt. Það er ekkert víst að slíkar sprengjur komi frá frambjóðendum sjálfum heldur stuðningsmönnum eða fjölmiðlum sem hafa verið að vinna í einhverjum málum um langa hríð.“

Björn Ingi segir þó að eftir því sem nær dregur kosningum þá hafi slíkt minni áhrif. „Skítabombur eiga það nú til að springa beint framan í þá sem setja þær fram,“ sagði Björn og rifjaði upp að árið 1996 hafi heilsíðuauglýsingar birst í dagblöðum til höfuðs Ólafi Ragnari Grímssyni. Þær hafi fengið fólk til að halda með honum því fólk kunni ekki að meta slíka taktík.

Björn Ingi segir að forvitnilegir dagar séu fram undan. „Það er ekkert ofsagt að við séum að horfa fram á það sem hlýtur að verða mest spennandi forsetakjör síðan Ísland varð lýðveldi.“