29 ára karlmaður var í síðustu viku dæmdur í 15 mánaða fangelsi af undirrétti í Horsens í Danmörku fyrir að hafa fjórum sinnum kastað sýru að stúlkum og ungum konum á aldrinum 11 til 18 ára. Hann var einnig sakfelldur fyrir að hafa tekið myndir upp undir pils og kjóla 107 stúlkna og kvenna.

Lögreglan skýrði frá þessu á samfélagsmiðlinum X.

Maðurinn var handtekinn í lok nóvember en brotin áttu sér stað frá því í lok október og fram að handtökunni en rétt fyrir hana kastaði maðurinn sýru að stúlkunum og konunum. Sýran gerði gat á föt þeirra og tvær fengu sýru á húðina en sluppu nokkurn veginn ómeiddar.

Maðurinn játaði sök þegar gæsluvarðhaldskrafa var tekin fyrir hjá dómara en hann neitaði að hafa beitt stúlkurnar og konurnar grófu ofbeldi.