„Takk Bandaríkin. Þetta mun koma í veg fyrir að stríðið breiðist út og þetta mun bjarga þúsundum og aftur þúsundum mannslífa.“ Þetta sagði Volodymyr Zelenskyy, forseti Úkraínu eftir að ljóst var að fulltrúadeild Bandaríkjaþings hafði samþykkt að veita 60 milljörðum dollara til aðstoðar Úkraínu í stríðinu gegn Rússlandi.

Zelenskyy sagði að þessi nýi hjálparpakki  sendi sterk skilaboð um að landið hans verði ekki „annað Afganistan“.

„Með þessum pakka senda Bandaríkin þau skilaboð að þau standi með Úkraínu. Úkraína á nú möguleika á að sigra,“ sagði hann.

Zelenskyy sagði að Úkraína þurfi einna helst á langdrægum vopnum að halda og loftvarnarkerfum.

Þverpólitískur stuðningur var við hjálparpakkann í fulltrúadeildinni en hluti þingmanna Repúblikanaflokksins hafði haldið frumvarpinu í frosti mánuðum saman.