Mauricio Pochettino, stjóri Chelsea, segir að hann hafi rætt við leikmenn liðsins eftir óþarfa atvik sem átti sér stað á mánudag.

Leikmenn Chelsea rifust þá um hver fengi að taka vítaspyrnu gegn Everton en það fyrrnefnda vann sannfærandi 6-0 sigur.

Noni Madueke og Nicolas Jackson vildu fá að taka spyrnuna sem var dæmd en vítaspyrnuskytta Chelsea, Cole Palmer, steig að sjálfsögðu á punktinn.

Madueke og Jackson voru pirraðir í kjölfarið en Palmer skoraði af öryggi og kom boltanum í netið í fjórða sinn í leiknum.

,,Við töluðum mikið saman eftir mánudaginn, við höfum æft vítaspyrnur og rætt saman,“ sagði Pochettino léttur.

,,Við þurfum að halda áfram sama striki, við þurfum að vera sniðugir. Þetta eru klókir strákar og þeir skilja stöðuna.“

,,Þessir leikmenn þurfa að skilja reglurnar og virða þær.“