Lögreglan á höfuðborgarsvæðinu hafði í mörg horn að líta í gærkvöldi og í nótt ef marka má dagbók lögreglu yfir þau verkefni sem bar helst á góma. Athygli vekur að börn og ungmenni komu við sögu í nokkrum málum.

Lögreglu var tilkynnt um líkamsárás í hverfi 108 í gærkvöldi. Tveir árásaraðilar voru handteknir á staðnum og sleppt að lokinni skýrslutöku. Þeir eru báðir undir lögaldri og málið því unnið í samráði við forráðamenn og barnavernd.

Lögregla fékk svo tilkynningu um barn að aka stolinni bifreið í hverfi 109. Málið er unnið í samstarfi við forráðamenn og barnavernd, að því er segir í skeyti lögreglu.

Tilkynnt var í tvígang um unglinga að skemma hluti í og við Mjóddina í gærkvöldi. Ungmennin voru farin af vettvangi þegar lögreglu bar að garði í bæði skiptin.

Loks var tilkynnt um ölvaða unglinga í hverfi 112. Málið er unnið í samstarfi við forráðamenn og barnavernd.