Ástæðan er ný taktík Úkraínumanna í stríðinu við rússneska innrásarherinn og sú staðreynd að fyrrgreindur staður, sem heitir Yamal Cross, gæti verið sannkallað draumaskotmark fyrir úkraínska herinn.
Yamal Cross er ekki beint í alfaraleið eða um 3.000 km austan við Moskvu. Það tekur um 45 klukkustundir að aka þangað frá höfuðborginni. Þetta er sem sagt mjög langt frá þeim hluta Rússlands sem flestir Evrópubúar þekkja.
En samt sem áður hlýtur þetta að vera staður sem yfirmenn úkraínska hersins eiga sér heitan draum um að gera árás á. Ástæðan er að í Yamal Cross tengist meirihluti rússneskra gasleiðslna saman eða allt að 85% þeirra að sögn úkraínskra herbloggara.
Þetta væri því upplagt ofurskotmark í þeirri taktík sem Úkraínumenn beita núna en hún er að ráðast á rússneska olíu- og gasinnviði.
Á síðustu mánuðum hafa þeir gert fjölda árása á rússneskar olíuvinnslustöðvar og hafa notað dróna við þær.
Markmiðið með þessum árásum er að veikja getu Rússa til stríðsreksturs og um leið efnahag þeirra því gas er stærsta útflutningsvara þeirra.
En það er um langan veg að fara frá landamærum Úkraínu og Rússlands til Yamal Cross eða 3.800 kílómetrar. Úkraínumönnum hefur fram að þessu tekist að gera árás á St Pétursborg, sem er um 1.300 kílómetra frá úkraínsku landamærunum, en fjær heimalandi sínu hafa þeir ekki getað gert árásir.
