Annie Kilner, eiginkona Walker, sparkaði honum út í byrjun árs. Þá kom í ljós að Walker hafði barnað Lauryn Goodman í tvígang. Kilner vissi af fyrra barninu en Walker hafði neitað fyrir að eiga það síðara.
Walker játar þetta í viðtalinu og viðurkennir að hjónaband hans og Kilner sé sennilega á enda.
„Ég er lokaður maður. Ég sætti mig hins vegar við að ég er opinber persóna og þarf að ræða það sem ég hef gert. Ég vona að ég geti útskýrt mitt mál svo eiginkona mín og börn fái það næði sem þau þurfa og eiga skilið,“ segir Walker.
„Ég hef náð meiri árangri í fótbolta en ég hefði nokkurn tímann trúað. En að særa besta vin minn, það er ansi sárt. Hvernig gat ég sært einhverja sem ég elska svona mikið. Það er eitthvað sem ég þarf að finna út úr sjálfur.“
Walker segir að hann þurfi að fara í sjálfskoðun.
„Ég þarf að finna út af hverju ég hef gert þetta og af hverju þessi staða kemur upp. Ég er mannlegur og geri mistök innan vallar sem utan. Þau utan vallar særa mun meira. Fótbolti hefur verið líf mitt síðan ég var sex ára. En fjölskyldan kemur á undan öllu öðru. Eins og er eru þau í sárum.“
Walker segir einnig frá því að þegar hann komst að því að Goodman væri ófrísk að öðru barni hans hafi hann samþykkt að fara til Bayern Munchen, eitthvað sem varð svo aldrei af.
„Ég reyndi að flýja. Mig langaði ekki að fara frá City. Við erum besta lið heims um þessar mundir. En þetta var tækifæri til að komast burt frá Englandi og umfjölluninni um mig þar.“
