Það sem er einna mest pirrandi við að eiga snjallsíma á borð við iPhone er sú staðreynd að rafhlaðan getur stundum verið fljót að tæmast – sérstaklega þegar tækið er komið til ára sinna.

En það eru til ýmsar aðferðir til að lengja líf rafhlöðunnar og hefur fyrrverandi starfsmaður Apple vakið talsverða athygli á TikTok þar sem hann birtir myndbönd og leiðbeiningar um ýmislegt varðandi iPhone-snjalltækin.

Allir þekkja stillingar eins og Low Power Mode sem takmarkar virkni þeirra forrita sem eru ekki í notkun hverju sinni. En það eru til fleiri aðferðir eins og starfsmaðurinn fyrrverandi, Tyler Morgan, bendir á til að gera ekki út af við rafhlöðuna á símanum.

„Ekki hlaða símann þinn upp í 100% og ekki hlaða hann á næturnar. Það er nóg að hlaða hann upp í 80%,“ segir hann en tekur fram að ef þú ert að fara langt, eða þangað sem erfitt er að komast í hleðslu, sé í lagi að hlaða símann upp í 100% en það eigi að heyra til undantekninga.

Þá hvetur hann eigendur iPhone-snjallsíma til að notast við það sem kallað er Optimised Battery Charging, en þá styðst síminn við upplýsingar um hvenær eigandinn þarf alla jafna að nota símann. Hugbúnaðurinn frestar því að hlaða símann upp fyrir 80% og styttir þar með tímann sem hann fer í 100% meðan hann er í sambandi. Þetta á að lengja líf rafhlöðunnar.

Tyler er með fleiri ráð, til dæmis að slökkva á forritum sem eru í gangi í bakgrunninum en ekki í notkun. Til að gera þetta þarf að fara í Settings > General > Background App Refresh. Þar er hægt að slökkva á „bakgrunnsvinnslu“ allra forrita eða velja þau sem þú vilt slökkva á. „Nei, þú færð ekki tilkynningar frá Instagram en þú sparar rafhlöðuna,“ segir hann.

Þá mælir hann með því að slökkva á svokallaðri „staðsetningarþjónustu“ (e. location services) snjallforrita sem ekki eru í reglulegri notkun. Þetta er gert með því að fara í Settings > Privacy & Security > Locations Services. Þar geturðu slökkt á öllum forritunum eða valið þau sem þú vilt slökkva á.

Tyler nefnir fleiri leiðir til að spara rafhlöðuna, til dæmis að slökkva á Bluetooth eða Siri og minnka birtustigið á skjánum.

@hitomidocameraroll Let me know how much longer your battery lasts if you do all these…cause I can’t be bothered to do it myself. #savebatterylife #iphone #apple #iphonebattery #battery #iphonehacks #tech #ios #settings ♬ Le Monde – From Talk to Me – Richard Carter