Þetta segir Björn Leví Gunnarsson, þingmaður Pírata, í aðsendri grein í Morgunblaðinu í dag. Í grein sinni segir hann ástæðulaust að ræna banka þegar hægt er að búa til VSK-númer.
Hann bendir á að ársskýrslur skattrannsóknarstjóra frá árinu 2013 séu aðgengilegar á vef stofnunarinnar og í þeim öllum sé bent á skattsvik með eftirfarandi orðum:
„Gefnir eru út tilhæfulausir reikningar sem ganga kaupum og sölum í þeim tilgangi að ná út fjármunum úr ríkissjóði í formi innskatts og mál þar sem tekjum er skotið undan í gegnum flókin net aflandsfélaga.“
Björn segir að ríkissjóður verði af tíu milljörðum króna vegna þessa en þrátt fyrir það geri ríkisstjórnin lítið til að bregðast við.
„Í febrúar á þessu ári kom út sérstök skýrsla um skattsvik vegna tilhæfulausra reikninga. Þar leggur starfshópur fram um 20 tillögur að úrbótum sem ég bjóst fastlega við að kæmu til afgreiðslu þingsins á þessu haustþingi – að minnsta kosti þær tillögur sem koma í veg fyrir 10 milljarða tap á almannafé á ári,“ segir Björn sem bætir við að þingflokkur Pírata leggi til breytingar á lögum til að skattrannsóknarstjóri geti stöðvað þessi skattsvik um leið og þau komast upp í afgreiðslu fjárlaga nú fyrir áramót.
Hann útskýrir svo þessar breytingar:
„Breytingarnar eru einfaldar en þær snúast um að hægt sé að loka VSK-númerum sem uppfylla ekki kröfur skattsins um fullnægjandi upplýsingar og aðrar eðlilegar og almennar kröfur um gagnaskil. Það þarf ekki einu sinni mikla vinnu til þess að sníða til breytingarnar, tillögurnar liggja nú þegar fyrir í skýrslu starfshóps ríkisskattstjóra eins og fyrr segir. Því er afsökun stjórnvalda á aðgerðaleysi nákvæmlega engin.“
Hann veltir því einnig upp að miðað við ábendingar um umrætt svindl frá skattrannsóknarstjóra í að minnsta kosti heilan áratug megi einnig spyrja spurninga um ábyrgð stjórnvalda á vanrækslu.
„Hefur það verið skoðun stjórnvalda að þetta sé bara í fína lagi, og þess vegna hafa ekki komið neinar tillögur um að laga þetta frá stjórnvöldum? Ég ætla að leyfa mér að efast um það, en það þýðir þá að þetta hefur ekki verið forgangsmál hjá undanförnum ríkisstjórnum og núverandi ríkisstjórn skipaði ekki starfshóp fyrr en eftir rúmlega heilt kjörtímabil. Hversu lengi á svo að draga lappirnar í viðbót?“
Björn segir að þingflokki Pírata finnist allavega óþarfi að bíða lengur.
„Það er mjög einfalt að gefa skattrannsóknarstjóra heimildir til þess að stöðva starfsemi umsvifalaust sem ber öll einkenni þess að gefa út tilhæfulausa reikninga. Ágóðinn yrði um 10 milljarðar á hverju ári, sem fara í dag til fólks sem svindlar undan skatti, og einnig meiri gæði í skattamálum lögaðila.“
