Þegar blaðakonan Elena Kostyuchenko fór á veitingastað í München þann 18. október síðastliðinn til að borða hádegismat var búið að vara hana við að hún lifði lífinu hættulega.
Ástæðan er að hálfu ári áður ferðaðist hún um Úkraínu og aflaði gagna um stríðsglæpi Rússa. Þegar hún lauk því verkefni bað aðalritstjóri hins óháða rússneska miðils Novaya Gazeta, sem er vinnuveitandi Kostyuchenko, hana um að fara ekki aftur til Rússlands.
Að máltíðinni lokinni hélt hún í átt til Berlínar. Á leiðinni fór hún að sýna eitrunareinkenni. Hún fékk bakverki, ógleði, líkaminn þrútnaði og það var blóð í þvaginu.
Bellingcat og The Insider fjölluðu um málið og spurðu nokkra sérfræðinga um sjúkdómseinkennin og voru þeir sammála um allt bendi til að eitrað hafi verið fyrir Kostyuchenko þennan dag. Einn sérfræðinganna er einn þeirra lækna sem rannsökuðu rússneska stjórnarandstæðinginn Aleksei Navalny þegar eitrað var fyrir honum.
Fjölmiðlarnir létu taka blóðsýni úr Kostyuchenko mörgum mánuðum síðar og leiddi rannsókn á þeim í ljós í því var mikið magn af lifrarensímunum alanintransaminase og aspartattransaminase. Það bendir til að lifrin hafi verið í yfirvinnu. Ekki var hægt að staðfesta að eitrað hefði verið fyrir henni.
Þýska lögreglan er enn að rannsaka málið.
En fleiri álíka mál hafa komið upp. Líklega var eitrað fyrir tveimur öðrum rússneskum konum í evrópskum stórborgum síðasta árið. Þetta eru blaðakonan Irina Babloyan og aðgerðasinninn Natalia Arno.
Babloyan sagðist hafa fundið fyrir sömu einkennum og Kostyuchenko í október á síðasta ári. Þá var hún á hóteli í Tbilisi í Georgíu, skömmu eftir að hún flúði frá Rússlandi.
Líklegt er talið að eitrað hafi verið fyrir Arno, sem er leiðtogi Free Russia Foundation, þegar hún gisti á hóteli í Prag í maí. Hún býr í Bandaríkjunum og hefur gert síðan hún flúði Rússland fyrir 10 árum. Sjúkdómseinkenni hennar benda til að eitrað hafi verið fyrir henni með taugaeitri.
