Bæjarfulltrúi Sjálfstæðisflokks í Kópavogi, Hannes Steindórsson fasteignasali, ætlar að segja af sér á fundi bæjarstjórnar á morgun, þetta kemur fram í frétt mbl.is.

Ástæðan mun vera sú að Hannes telur tíma setum betur varið í að selja fasteignir og að ala upp börn sín. Annir í dagvinnunni séu slíkar að hann geti ekki starfað í þágu bæjarins eins og hann hefði viljað. Mun Elísabet Sveinsdóttir taka við sæti hans.

Hannes segist þakklátur Kópavogsbúum fyrir að hafa gefið honum þetta tækifæri, þetta hafi verið lærdómsríkt, áhugavert og skemmtilegt. Hann ætlar þó ekki að segja alfarið skilið við stjórnmálin og segir það aldrei að vita hvað framtíðin felur í skauti sér.