Alfreð Finnbogason er klár í undankeppni Evrópumótsins með íslenska karlalandsliðinu, fái hann kallið. Hann segir spennandi tíma framundan hjá liðinu.
Hinn 34 ára gamli Alfreð er í ítarlegu viðtali við Fréttablaðið í dag, þar sem hann tjáir sig meðal annars um landsliðið.
Ísland hefur leik í undankeppni EM 2024 í lok mánaðar. Liðið mætir Bosníu og Hersegóvínu ytra þann 23. mars. Þremur dögum síðar heimsækja Strákarnir okkar Liechtenstein.
„Vandamálið síðustu ár varðandi landsliðið hefur verið mín meiðslasaga, ég hef ekki verið heill heilsu fyrir landsliðsverkefnin. Ég sneri aftur í landsliðið í september á síðasta ári, það var gríðarlega gaman þó svo að það væri eins og ég væri að koma inn í nýtt lið. Það voru margir nýir leikmenn og margt sem hafði breyst frá því síðast,“ segir Alfreð, en mikil kynslóðaskipti hafa orðið á íslenska karlalandsliðinu.
„Það eru bara virkilega spennandi tímar fram undan hjá landsliðinu, auðvitað er mikill munur á yngstu og elstu leikmönnum en ég held að þetta sé blanda sem geti orðið til þess að góðir hlutir gerist. Ég er mjög spenntur fyrir næstu landsleikjum sem og landsleikjaárinu fram undan.“
Alfreð telur möguleika Íslands á að komast í lokakeppni EM vera til staðar.
„Það eru möguleikar í stöðunni. Það eru bara tíu leikir í þessari undankeppni og þetta mun ráðast á smáatriðum, eitt mark til eða frá í mikilvægum leikjum getur orðið rosalega dýrt á endanum. Þess vegna er þessi fyrsti leikur í keppninni gríðarlega mikilvægur, án þess þó að ég sé að ýkja það eitthvað rosalega mikið.
Grunnurinn er sá sami og alltaf. Við verðum að vinna okkar heimaleiki, fá sem flest stig þar og reyna að kroppa í sem flest stig á útivelli.“
