Jóhannes Þór Skúlason, framkvæmdastjóri Samtaka ferðaþjónustunnar, segir að gríðarlega alvarleg staða sé í uppsiglingu varðandi yfirvofandi verkfall Eflingar. Hann segir að verkfall muni þýða skelfilega stöðu fyrir ferðaþjónustufyrirtæki.

Fréttablaðið skýrir frá þessu í dag og hefur eftir Jóhannesi að Eflingarfólk hljóti að hugsa sig tvisvar um áður en það greiði atkvæði með verkfalli og kasti milljarðakjarabótum frá sér afturvirkt.

Stefán Ólafsson, starfsmaður Eflingar og fyrrum félagsfræðiprófessor, sagði að ef til verkfalls komi verði það alfarið löglegt. „Það er enginn að hugsa um allsherjarverkfall núna en það þarf ekki alltaf marga starfsmenn sem leggja niður vinnu til að áhrifin í samfélaginu geti orðið mjög mikil,“ sagði hann.

Eflingarfólk vinnur meðal annars við ræstingar, akstur af ýmsu tagi og uppskipun. Verkfall þess gæti einnig haft áhrif á olíuflutninga.

Jóhannes sagði að ferðaþjónustufyrirtækin séu nýkomin út úr heimsfaraldrinum sem hafi valdið þeim miklu tekjutap og eigið fé þeirra hafi brunnið upp. Verkföll munu að hans sögn ekki aðeins reynast ferðaþjónustufyrirtækjum dýr, heldur mun allt samfélagið verða fyrir gríðarlegu tjóni.

Hægt er að lesa nánar um málið í Fréttablaðinu í dag.