Þetta sagði Jens Stoltenberg í spjallþættinum „Lindmo“ hjá Norska ríkisútvarpinu NRK á föstudaginn. Hér fyrir neðan er hægt að lesa fyrri umfjöllun DV um það sem Stoltenberg sagði í þættinum.
Stoltenberg óttast að stórstyrjöld brjótist út á milli NATO og Rússlands
Áhyggjur Stoltenberg eru ekki ástæðulausar og það að hann sagði þetta í þættinum gæti verið byggt á samningi á milli NATO og Bandaríkjanna. Þetta sagði Peter Viggo Jakobsen, lektor í alþjóðastjórnmálum við danska varnarmálaskólann, í samtali við Ekstra Bladet.
„Þetta er vegna þess að menn hafa áhyggjur af hvað getur gerst ef Úkraínumönnum tekst að brjótast í gegnum rússnesku varnarlínurnar. Sérstaklega niðri við Svartahafið þannig að þeir geta komist til Krím,“ sagði Jakobsen
Hann sagði að Krím geti verið afgerandi fyrir hættuna á að Pútín beiti kjarnorkuvopnum og að til stórstyrjaldar komi. „Krím getur verið rauða línan,“ sagði hann og vísaði þar til þess að Rússar hafa sagt að ekki sé útilokað að þeir beiti kjarnorkuvopnum ef Úkraínumenn fari yfir „rauða strikið“. Ef það stefni í að Úkraínumenn séu að ná Krím á sitt vald geti það orðið til þess að Rússar beiti kjarnorkuvopnum.
Sagði Jakobsen að ekki sé útilokað að ummæli Stoltenberg séu byggð á sameiginlegri ákvörðun Bandaríkjanna og NATO um að senda Zelenskyy, Úkraínuforseta, og Vesturlöndum skilaboð um að Úkraínumenn verði kannski að halda aðeins aftur af sér.
„Venjulega hafa Bandaríkjamenn góða stjórn á því sem framkvæmdastjóri NATO segir og gerir. Ein af hugmyndunum með að segja þetta er að gefa til kynna að Úkraínumenn eigi að láta vera að ná miklu meira landi aftur úr höndum Rússa. Vandinn, séður með vestrænum augum, er að ef við leyfum Úkraínumönnum að hrekja Rússa á brott, þá eru mjög mikil hætta á að þeir beiti vígvallarkjarnorkuvopnum í Úkraínu til að koma í veg fyrir það,“ sagði hann.
