Ragnar Bragi Sveinsson leikmaður Fylkis og Ómar Ingi Guðmundsson þjálfari HK komu í settið hjá Íþróttavikunni með Benna Bó sem sýnd er á Hringbraut á föstudögum.

Bæði lið fóru upp í Bestu deildina og voru langbest í nánast allt sumar.

Ómar tók við keflinu þegar Brynjar Björn yfirgaf HK í upphafi sumars og var valin þjálfari ársins, eitthvað sem fáir áttu von á þegar tímabilið hófst. „Ég átti nú ekki von á því að stýra liðinu í sumar þannig það var langsótt að ætlast til að fá þennan heiður.“

Benedikt Bóas spurði Ómar hvað hafi flogið í gegnum hugann þegar stjórnarmenn HK báðu hann um að stýra liðinu. „Fyrst þegar þetta kom upp var planið að ég tæki næstu leiki og fæ Kára (Jónasson) sem þjálfaði nú Ragnar í gamla daga með mér. Hann er að þjálfa annan flokkinn og planið að ég taki einhverja tvo leiki. Svo gengur þetta fínt og félagið hætti að líta í kringum sig og þetta small. Ég fékk traustið út tímabilið og það gekk vel.“

Hann segir að hann verði áfram hjá HK en í hvaða mynd á eftir að koma í ljós. „Ég mun þjálfa Meistaraflokk áfram en í hvaða mynd við munum teikna þetta upp er ekki komið á hreint. En ég verð í þjálfarateyminu.“