Fólk taldi hann hafa gengist undir fegrunaraðgerðir vegna breytts útlits stjörnunnar.
Leikarinn kom við sögu í Earth Day! The Musical í apríl 2021, sem var verkefni frá Bill Nye og Justin Bieber til að vekja athygli á hlýnun jarðar.
Þrátt fyrir stutt innslag vakti Zac mikla athygli og skjáskot úr þættinum fóru á dreifingu um samfélagsmiðla. Netverjar voru handvissir um að hann hefði látið sprauta bótoxi og fylliefni í andlit sitt, sérstaklega kjálkann.
Zac tjáði sig aldrei um málið á sínum tíma en rýfur nú þögnina rúmlega ári seinna. Í viðtali við Men‘s Health segir leikarinn að ástæðan fyrir breyttu útliti sínu í þættinum sé slys sem hann lenti í.
Hann var að hlaupa um heima hjá sér á sokkaleistunum og rann til svo hann skall með hökuna á graníthorn og missti meðvitund.
Hann segir að þegar hann vaknaði þá muni hann eftir því hvernig hökubeinið „hékk af andliti“ hans.
Í kjölfarið fóru aðrir andlitsvöðvar í fulla yfirvinnu á meðan þeir meiddu voru að jafna sig og þess vegna átti þessi útlitsbreyting sér stað. Síðan þá hefur hann verið í meðhöndlun hjá sérfræðingi og sjúkraþjálfara.
„Tyggjandi vöðvarnir (e. masseters) stækkuðu bara. Þeir urðu bara mjög, mjög stórir,“ segir hann.
Leikarinn varð ekki var við umtalið á samfélagsmiðlum – þar sem hann heldur sig frá þeim – fyrr en móðir hans hringdi í hann og spurði hvort hann hefði gengist undir fegrunaraðgerð.