Ísland tekur á móti Hvíta-Rússlandi í undankeppni HM í kvöld. Um afar mikilvægan leik er að ræða. Leikið er á Laugardalsvelli.
Ísland er í öðru sæti undanriðilsins sem stendur, tveimur stigum á eftir Hollandi. Stelpurnar okkar eiga hins vegar eftir að leika tvo leiki en þær hollensku aðeins einn, gegn Íslandi.
Íslenska liðið getur því komið sér í kjörstöðu fyrir leikinn gegn Hollandi, sem fer fram ytra á þriðjudag, með sigri á Hvít-Rússum í kvöld.
Leikurinn hefst klukkan 17:30. Hefur það vakið töluverða athygli. Það þykir ansi snemma, enda háanna tími, rétt eftir vinnu hjá fólki.
Val á leiktímanum er sameiginleg ákvörðun RÚV og KSÍ, þar sem sjónvarpsrétthafinn hefur þó töluvert að segja.
„Sjónvarpsrétthafinn hefur, alveg sama um hvaða mót ræðir, alltaf mikið að segja um leiktímann því rétthafinn er auðvitað búinn að borga fyrir ákveðinn sýningarrétt og vill auðvitað hámarka áhorfið,“ segir Ómar Smárason, deildarstjóri samskiptadeildar KSÍ, í samtali við Fréttablaðið.
„Hvað þessa leiki varðar þá er þetta bara niðurstaða úr samtali milli KSÍ og RÚV. Þar er fundið eitthvað jafnvægi, á hvaða tíma það sé best fyrir RÚV og sem flesta að horfa á leikinn og á hvaða tíma sé best að leikurinn fari fram til þess að fá sem flesta á völlinn. 17:30 var bara lendingin að þessu sinni.“
Klukkan 20:15 í kvöld sýnir RÚV tónleika Sinfoníuhljómsveitar Íslands. Ómar var spurður út í hvort þetta hefði áhrif á valið.
„Ég bara veit það ekki. Það hlýtur að hafa eitthvað um þetta að segja. RÚV hefur náttúrulega bara sínar ástæður fyrir þessu.“
