Á síðustu árum hefur innflutningur á kjötvörum og öðrum landbúnaðarvörum hingað til lands stóraukist. Athygli vekur að það eru ekki síst innlendir kjötframleiðendur sem standa að þessum innflutningi en þeir sömu hafa oft og tíðum lagst gegn innflutningi á erlendum landbúnaðarafurðum.

Fréttablaðið skýrir frá þessu í dag. Segir að blaðið að miðað við niðurstöður útboða á tollkvóta þá hafi innflutningur bænda og afurðastöðva á búvörum aukist verulega síðustu ár og þá sérstaklega eftir að tollkvótar, samkvæmt samningi við ESB, voru stækkaðir 2019.

Segir blaðið að í síðasta útboði á tollkvóta frá ESB-ríkjunum hafi innlendir framleiðendur verið með 90% af innflutningnum af svínakjöti, 43% af nautakjöti, 34% af alifuglum og 25% af skinku.

Blaðið segir að innlendir búvöruframleiðendur hafi einnig stóraukið innflutning á búvörum frá ríkjum utan ESB og frá öðrum heimsálfum á síðustu árum.

Niðurstöður útboða sýna að sögn Fréttablaðsins að innlendir kjötframleiðendur bjóði hátt í tollkvóta og séu að verða meðal umsvifamestu innflytjenda búvara. Svo virðist sem þeir keyri áfram verðhækkanir á útboðsgjaldi í sumum vöruflokkum.

Flest umræddra fyrirtækja, eða samtök þeirra, áttu aðild að vefsíðunni oruggurmatur.is þar sem varað var við innflutningi á búvörum og hann sagður rjúfa þá vernd sem lega landsins veiti og skapa raunverulega hættu fyrir almenning. Vefsíðunni hefur nú verið lokað.