Bandaríkin unnu í dómsmáli á þriðjudaginn og gátu þá lagt hald á „ofursnekkju“ í eigu rússnesks ólígarka í Fídjí. Það var engan tíma að missa og snekkjunni, að virði um 42 milljarða króna, var siglt frá eyríkinu. Hæstiréttur Fídjí aflétti siglingarbanni sem hann hafði sett á snekkjuna sem kom í veg fyrir að Bandaríkin náði að gera hana upptæka.
Dómsúrskurðurinn var mikill sigur fyrir Bandaríkin í herferð þeirra að gera upptækar eignir rússneskra auðjöfra um allan heim, samkvæmt AP. Bandaríkin fjarlægðu bátinn innan við klukkutíma frá því að úrskurðurinn var lesinn upp.
Áfrýjunarréttur Fídjí vísaði málinu frá í maí eftir áfrýjun Feizals Haniff, lögfræðingi fyrirtækisins sem lagalega séð er eigandi „ofursnekkjunnar,“ sem fer undir nafninu Amadea. Feizal hélt því fram að Bandaríkin hefðu ekki lögsögu til að gera snekkjuna upptæka, allavega ekki þangað til að kæmi í ljós hver væri í raun eigandi hennar.
Bandaríkin héldu því fram að rannsókn þeirra á henni hafi sýnt að lúxussnekkjan, sem sigldi undir fána Cayman-eyja, væri í raun í eigu rússneska auðjöfursins Suleiman Kerimov. Eignir hans eru metnar á um tvær billjónir króna. Það er, tvær milljón milljónir. Alríkislögregla Bandaríkjanna, FBI, tengdi snekkjuna við Kerimov-fjölskylduna vegna leyninafna sem hún notaði um borð og kaup á hlutum eins og pítsaofn og heilsulindarrúmi.
Snekkjan, sem er meira en hundrað metra löng, skartar meðal annars búri með lifandi humrum, handmáluðu píanó, sundlaug og stórum þyrlupalli.
