Það voru tveir Íslendingaslagir í norsku úrvalsdeildinni í kvöld.

Bodo/Glimt tók á móti Stromsgodset í öðrum þeirra. Alfons Sampsted lék allan leikinn með fyrrnefnda liðinu og það gerði Ari Leifsson einnig fyrir það síðarnefnda. Leiknum lauk 2-2.

Í hinum mættust Lilleström og Valarenga. Brynjar Ingi Bjarnason lék allan leikinn með Valarenga og kom Viðar Örn Kjartansson inn á sem varamaður þegar tæpur hálftími var eftir. Hólmbert Aron Friðjónsson lék síðustu mínútur leiksins með Lilleström sem vann 2-0 sigur.

Þá voru markvörðurinn Patrik Sigurður Gunnarsson og miðjumaðurinn Samúel Kári Friðjónsson í byrjunarliði Viking sem gerði 1-1 jafntefli gegn Ham-Kam.

Lilleström er á toppi deildarinnar með 23 stig, tveimur stigum á undan Viking. Stromsgodset er í fjórða sæti með 14 stig, Bodo/Glimt í sjötta með 13 stig og loks er Valarenga í tíunda sæti með tíu stig.

Í úrvalsdeildinni kvennamegin voru Íslenskir leikmenn einnig í eldlínunni.

Svava Rós Guðmundsdóttir var í byrjunarliði Brann í 2-0 sigri á Roa. Þá var Selma Sól Magnúsdóttir í byrjunarliði Rosenborg í 1-0 sigri gegn Lilleström. Loks lék Ingibjörg Sigurðardóttir allan leikinn með Valarenga í 1-4 sigri gegn Stabæk.

Brann er á toppi deildarinnar með 31 stig, Valarenga er í öðru með 28 stig og Rosenborg í því þriðja með 25 stig. Það má því segja að Íslendingaliðin í deildinni séu í sérflokki en 10 stig munar á Rosenborg og liðinu í fjórða sæti.