Þetta kemur fram í nýrri rannsókn. Meðal niðurstaðna hennar er að þeim mun sjaldnar sem konur fá fullnægingu við samfarir, þeim mun minni væntingar hafi þær til kynlífs.
„Þetta fyrirbæri skiptir miklu um nautn kvenna og almennrar vellíðunar þeirra. Konur læra að sætta sig við minna þegar kemur að kynlífi. Þetta er mikilvægt varðandi jafnrétti,“ er haft eftir Grace Wetzel í fréttatilkynningu en hún er doktorsnemi við Rutgers háskólann í Bandaríkjunum.
104 pör, sem öll eru virk kynferðislega, tóku þátt í rannsókninni. Þátttakendurnir voru spurðir út í kynlífið, meðal annars um væntingar til þess, hversu oft þeir fengju fullnægingu og hversu oft þeir vildu fá fullnægingu.
Niðurstaðan var að karlar fengu oftar fullnægingu en konur. Bæði kynin gerðu sér ákveðnar væntingar um fullnægingar og upplifun í kynlífinu en væntingarnar voru breytilegar og byggðust á upplifun þátttakendanna.
Vísindamennirnir segja að niðurstöðurnar bendi til að skortur á fullnægingum valdi því að minni væntingar séu um kynlífið með makanum.
„Væntingar okkar mótast af reynslu og þegar konur fá færri fullnægingar reikna þær með því. Vegna þess að konur draga úr kröfum sínum á þennan hátt verður ójafnvægið í sambandinu bara enn meira,“ sagði Wetzel og bætti við að konurnar skorti þar með hvatningu.
