Danski sagnfræðingurinn Steen Andersen fann áætlanir um kjarnorkuárás á Danmörku í kalda stríðs skjalasafninu í Póllandi. Um er að ræða 42 síðna áætlun um hvernig beita skyldi kjarnorkuvopnum gegn Danmörku.

Berlingske skýrði frá þessu. Fram kemur að áætlunin sé frá 1989. Samkvæmt henni átti að skjóta 131 kjarnorkuflaug og sprengjum á Danmörku í upphafi.

Andersen sagði að áætlunin hafi verið gerð af yfirmönnum pólska hersins en það þýði ekki að um pólska áætlun sé að ræða, hún hafi verið sovésk.

Samkvæmt frétt Berlingske átti að skjóta 131 kjarnorkusprengju, annað hvort með eldflaugum eða varpa þeim úr flugvélum, á skotmörk í Danmörku og rétt sunnan við landamærin við Þýskaland.

100 árásir átti að gera með sovéskum Scudflaugum en 31 með flugvélum. Meðal skotmarkanna voru stjórnstöðvar danska hersins á Sjálandi og á Jótlandi.

Kjarnorkuvopn voru geymd í sovéskum herstöðvum í Póllandi. Ef til þess kæmi að ráðist skyldi á Danmörku áttu pólskar hersveitir að fá sprengjurnar afhentar frá sovésku hersveitunum.

Samkvæmt áætluninni átti að hefja aðra umferð árása 50 mínútum eftir þá fyrri. Þá átti að nota 133 kjarnorkusprengjur.

Andersen sagði að þessi áætlun sé frábrugðin öðrum sovéskum árásaráætlunum vegna þeirrar miklu eyðileggingar sem stefnt var að. „Þetta var ekki stríðsáætlun, heldur áætlun um hryðjuverk sem átti að neyða Danmörku og NATÓ til uppgjafar,“ sagði hann í samtali við Berlingske.