Í dag er alþjóðlegur dagur fólks með Downs´s heilkennið. Af því tilefni fékk Kastjós á RUV til sín sérstakan gest til að taka viðtal. Það var enginn annar en Finnbogi Örn Rúnarsson sem er með Down´s.

Hann heldur úti bæði Facebooksíðu og Instagramreikningi undir yfirskriftinni Fréttir með Finnboga. Þar fjallar Finnbogi um daglegt líf í Hafnarfirði þar sem hann er búsettur en hann er ennfremur í 6. sæti á lista Vinstri grænna í Hafnarfirði fyrir komandi sveitastjórnarkosningar.

Sannur heiður fyrir Kastljós

Baldvin Þór Bergsson, ritstjóri Kastljóss, sagði að þau hefðu leitað til Finnboga og spurt hvort hann vildi taka viðtal fyrir þáttinn. Finnbogi hafi þá viljað taka viðtal við Katrínu Jakobsdóttur forsætisráðherra um stuðning íslenskra stjórnvalda við fötluð börn í Úkraínu. „Það er okkur sannur heiður á þessum degi að sýna viðtalið sem Finnbogi tók fyrr í dag,“ sagði Baldvin þegar hann kynnti innslagið með Finnboga og Katrínu.

Finnbogi benti á að reglulega bærust hræðilegar fréttir af fötluðu fólki sem er fætt í Úkraínu. Katrín sagði að íslensk stjórnvöld væru að taka á móti flóttafólki en leggi líka til fjárframlög til að hjálpa fólki að komast sjálfu burt. Hún benti einnig á að utanríkis- og félagsmálaráðherra hér á landi hefðu fengið áskorun frá ýmsum félagsamtökum sem starfa í þágu fatlaðs fólks, til að mynda Þroskahjálp og NPA miðstöðinni, og að það sé í skoðun hvað sé hægt að gera sérstaklega fyrir flóttafólk sem er með fötlun.

Sama þjónusta og öll önnur börn eiga rétt á

Katrín sagði að verið sé að undirbúa opnum móttökumiðstöðvar sem allt flóttafólk getur leitað til. Þar verði fólki vísað í viðeigandi úrræði, til dæmis þannig að börn komist í skóla og að fatlað fólk fái aðstoð við hæfi.

Finnbogi spurði Katrínu þá sérstaklega hvaða þjónustu fötluð börn komi til með að fá, og sagði Katrín að fötluð börn sem hingað koma eigi rétt á nákvæmlega sömu þjónustu og öll önnur börn á Íslandi.