Hrap Rússa á vinsældarlistum víða um heim og þverrandi áhrif þeirra á alþjóðavettvangi gerast á svo miklum hraða að í Moskvu sjá menn ekki annað en að þróunin sé mikið áfall. Á örskömmum tíma hafa mikilvæg tengsl og stöður, sem hefur tekið áratugi að byggja upp, hrunið til grunna.
Má þar nefna Þýskaland en samkomulag Þjóðverja og Rússa hefur verið gott síðustu áratugina og hafa Rússar í raun átt hauk í horni þar sem Þýskaland er. Þjóðverjar hafa átt í miklum viðskiptum við þá og hafa sýnt Rússum og umsvifum þeirra og aðgerðum skilning. Meira að segja eftir að Rússar hertóku Krím 2014 sneru Þjóðverjar ekki baki við þeim. Þýskir stjórnmálamenn, undir forystu Angela Merkel, heimiluðu til dæmis að gasleiðslan Nord Stream 2 yrði lögð.
En á síðustu dögum hafa Þjóðverjar tekið allt aðra afstöðu til Rússa. Olaf Scholz, kanslari, tilkynnti að Nord Stream 2 verði ekki tekin í notkun. Þjóðverjar studdu refsiaðgerðir gegn rússneskum bönkum og útilokun þeirra frá SWIFT greiðslukerfinu. Í gær tilkynnti Scholz síðan á aukafundi í þýska sambandsþinginu að Þjóðverjar muni auka útgjöld sín til varnarmála og muni framvegis nota rúmlega 2% af vergri þjóðarframleiðslu sinni til varnarmála. Strax á þessu ári auka þeir framlög til hersins um 100 milljarða evra. Þjóðverjar hafa einnig ákveðið að senda vopn til Úkraínu en það er algjör stefnubreyting hjá þeim.
„Þjóðverjar hafa gefið sérstakt samband sitt við Rússa upp á bátinn, það verður ekkert Nord Stream 2, vopn verða send til Úkraínu, harðar refsiaðgerðir,“ skrifaði Ulrich Speck, þýskur sérfræðingur í utanríkismálum, um ákvarðanir þýsku ríkisstjórnarinnar.
Álíka þróun má sjá í öðrum Evrópuríkjum þar sem Rússar hafa haft mikil áhrif, til dæmis á Ítalíu, Grikklandi og Ungverjalandi.
