Þorgerður Katrín Gunnarsdóttir, þingmaður Viðreisnar, fór hörðum orðum um vinstri menn í grein í Morgunblaðinu í gær.
Tilefni skrifa hennar voru þættirnir Verbúðin þar sem fjallað er um árdaga kvótakerfisins. Þar rifjaði Þorgerður upp að þegar kvótinn var gerður ótímabundinn á sínum tíma hafi Alþýðubandalagið verið við völd og hafi ákveðið að það væri mikilvægara að vera í ríkisstjórn en að leggjast gegn fyrirkomulaginu.
Í dag séu Vinstri Grænir að spila sama leik og hafi fórnað harðri andstöðu sinni við kvótakerfið til að geta verið í ríkisstjórn.
Steingrímur J. Sigfússon, fyrrum þingmaður Alþýðubandalagsins og Vinstri Grænna svaraði skrifum Þorgerðar í harðorðri grein í dag og Katrín Jakobsdóttir, forsætisráðherra og formaður Vinstri Grænna, sagði í samtali við RÚV í gær að ummæli Þorgerðar stæðust ekki skoðun.
„Ég er ekki viss um að þessi orð formanns Viðreisnar eldist vel. Það er auðvitað þannig þegar við skoðum þann árangur sem við Vinstri græn höfum náð í þessu stjórnarsamstarfi hingað til, þá standast þessi orð enga skoðun.“
Þorgerður hefur nú svarað þeim Katrínu og Steingrími og segir greinilegt að orð hennar hafi farið fyrir brjóstið á þeim.
„Viðbrögð Steingríms J. í Mogganum í dag og Katrínar Jakobsdóttur á RÚV í gær við grein minni um Verbúðina og Vinstri græn sýna glögglega að ég hef sett salt í ósköp viðkvæmt sár!
Ég vona hins vegar sannanlega að Katrín hafi rétt fyrir sér. Að orð mín munu ekki eldast vel. En aðeins tíminn – og verk VG í ríkisstjórninni mun leiða það í ljós. Síðustu ár gefa þó ekki tilefni til bjartsýni.“
