Axel Nikulásson, fyrrverandi körfuboltakappi og starfsmaður utanríkisráðuneytisins, er látinn en hann var aðeins 59 ára gamall. Frá þessu greinir Karfan.is en í grein þeirra kemur fram að Axel hafi barist við veikindi sem hann náði ekki að sigrast á, þrátt fyrir hetjulega baráttu.

„Axel spilaði með Keflavík lungan af ferli sínum og varð meistari með þeim Keflvíkingum þegar þeir tóku sinn fyrsta titil árið 1989. Þar áður hafði hann dvalið vestra í Bandaríkjunum við nám í háskóla. Árið eftir titilinn með Keflavík fór Axel svo til KR og titilinn stóri fylgdi honum þangað árið 1990. Axel tók svo að sér þjálfun seinna meir hjá KR í úrvalsdeildinni og svo tók hann við því fræga 1976 árgangs landsliði sem gerði góða hluti undir hans stjórn. Axel spilaði 63 landsleiki á sínum ferli fyrir íslands hönd. Eftir að ferlinum lauk starfaði Axel aðallega fyrir utanríkisráðuneytið og var iðulega búsettur erlendis,“ segir í grein Körfunnar um andlát Axels.

Þá er vísað í orð sem Jón Einarsson, stuðningsmaður Njarðvíkinga, ritaði á Facebook-síðu sína um „Hann hlýtur að hafa verið draumur hvers samherja að leika með. Sem áhorfanda uppi í stúku er minningin um leikmann sem lét sér ekki muna að svara fyrir sig með hnitmiðuðum frösum þegar svo bar undir. Það var ekki algengt að leikmenn væru að svara áhorfendum þegar þeir lésu leikmönnum pistilinn líkt og Axel átti til. Niðri á gólfi var Axel glerharður, oftar en ekki að kljást við kanana,“ segir Jón.