PfizerBioNTech verður tilbúið með nýtt bóluefni, sem er lagað að Ómíkronafbrigðinu, í mars. Þetta sagði Albert Bourla, forstjóri Pfizer, í gær að sögn Bloomberg News. Unnið hefur verið að þróun bóluefnisins síðan Ómíkron uppgötvaðist í Suður-Afríku í nóvember.

Í stórum hluta hins vestræna heims er byrjað að bjóða upp á örvunarskammt af bóluefni gegn kórónuveirunni og margir sérfræðingar hafa sagt að hugsanlega verði þörf fyrir annan örvunarskammt.

Ummæli Bourla eru til þess fallin að valda efasemdum um þörfina á öðrum örvunarskammti en hann sagði að fyrirtækið vonist til að nýja bóluefnið veiti enn betri vörn gegn smiti. Núverandi bóluefni veiti vörn gegn alvarlegum veikindum og sjúkrahúsinnlögnum ef fólk fái örvunarskammt.