Héraðsdómur hefur staðfest ákvörðun sóttvarnalæknis um tíu daga einangrun fimm einstaklinga með kórónuveiruna. Um er að ræða fimm einstaklinga í sömu fjölskyldu sem öll eru einkennalaus og ákváðu að láta reyna á réttmæti þess að þau væru skikkuð í tíu daga einangrun.

Arnar Þór Jónsson, lögmaður, gætti hagsmuna fólksins og var málið tekið fyrir í héraði á mánudag. Arnar sagði í samtali við Vísi að einangrun flestra í málinu hafi lokið á miðnætti og geti þeir því ekki áfrýjað málinu til Landsréttar þar sem þau hafi ekki lengur lögvarða hagsmuni. Er nú til skoðunar að áfrýja í máli þeirra sem enn eru í einangrun.

Arnar segir að dómari í málinu hafi þó gert athugasemd við upplýsingagjöf stjórnvalda til borgaranna, en sá misbrestur hafi ekki dugað til að ógilda einangrunina.

Ekki er um fyrsta málið að ræða þar sem reynir á lögmæti einangrunar sökum kórónuveirusmits en Arnar telur að önnur sjónarmið séu uppi núna með tilkomu Ómíkron afbrigðis en allt bendi til að það valdi vægari veikindum. Eins hafi vísindaleg gögn bent til þess að PCR-próf séu ekki áreiðanleg og að einkennalausir smiti ekki.

Samkvæmt gildandi reglum á Íslandi er einangrun 10 dagar, en hana er þó hægt að stytta að ráðum lækna á göngudeild COVID. Víða í heiminum hefur einangrun einkennalausra eða þeirra með lítil einkenni verið stytt niður í allt að 5 daga.

Heilbrigðisráðherra, Willum Þór Þórsson, býst við tillögum frá sóttvarnalækni í dag um mögulega styttingu einangrunar.