Landspítalinn er kominn á neyðarstig. Þetta kemur fram í tilkynningu frá spítalanum. Ástæðan er álagið sem nú er á honum, en í tilkynningunni segir að helsti áhrifavaldurinn sé hröð útbreiðsla Covid-19 í samfélaginu.

Fram kemur að meira en 100 starfsmenn geta ekki mætt til vinnu og sinnt sjúklingum vegna COVID smits. Og að annar eins hópur sé í sóttkví.

Því hefur verið gripið til þess neyðarúrræðis að kalla inn til vinnu starfsmenn sem eru skilgreindir í sóttkví í samfélaginu að uppfylltum ákveðnum skilyrðum.

Í tilkynningunni segir:

„Tiltekinn hluti legurýma er sérútbúinn fyrir sjúklinga sem eru með COVID og þau rými flest í notkun og ekki laus fyrir aðra. Innlögnum á spítalann vegna COVID fer fjölgandi og nú hafa bæst við smit sem hafa hafa greinst óvænt innan spítalans t.d á bráðamóttökum, hjartadeild, Landakoti og fleiri deildum.

Nú er svo komið að margar deildir þurfa að sinna COVID smituðum skjólstæðingum þar sem þeir greinast. Við þetta bætist síðan að ekki hefur náðst að útskrifa fólk sem þegar hefur lokið meðferð á spítalanum.“