Samningur hefur verið gerður á milli Félagsmálaráðuneytisins og Rauða krossins um að Rauði krossinn muni aðstoða þá Afgani, sem búa hér á landi, við að fá fjölskyldu sína til landsins. Ráðuneytið mun fjármagna stöðugildi þeirra sem munu aðstoða við útfyllingu umsókna um fjölskyldusameininga en það er talsvert flókið ferli.

Fréttablaðið skýrir frá þessu í dag. Haft er eftir Atla Viðari Thorstensen, sviðsstjóra alþjóðasviðs, að hann fagni þessum samningi. „Það skiptir miklu máli að halda vel utan um þetta. Við munum vinna þetta með stjórnvöldum og þeim Afgönum sem um ræðir þannig að hægt verði að tryggja sem skjótasta og réttlátasta málsmeðferð við þessar umsóknir,“ sagði hann og bætti við að í framhaldinu verði hægt að koma ættingjum til Íslands en þeir búa við erfiðar og jafnvel lífshættulegar aðstæður í Afganistan.

Stjórnvöld hafa verið í sambandi við 25 til 30 manns sem eru staddir í Afganistan. Á næstunni koma um 30 Afganar hingað til lands en þeir falla undir þá hópa sem stjórnvöld ákváðu að aðstoða sérstaklega. Heildarfjöldi Afgananna er því um 60 en ekki 90 eins og kom fram í minnisblaði forsætisráðuneytisins í síðustu viku.