,,Við þurfum að bæta okkur. Öll lið fara í gegnum erfið tímabil, við erum að því núna,“ sagði Ole Gunnar Solskjær, stjóri Manchester United, á fréttamannafundi.
Man Utd hefur gengið illa undanfarið, aðeins unnið tvo af síðustu sjö leikjum í öllum keppnum. Margir telja að sæti Solskjær sé að hitna.
,,Ég er alltaf að ræða við félagið, samtalið er opið og heiðarlegt. Það er pressa á mér, auðvitað. Við höfum bætt okkur í gegnum árin. Ég hef mín gildi svo lengi sem félagið trúir á mig. Ég hef mínar leiðir og hef trú á sjálfum mér,“ sagði Norðmaðurinn á fundinum.
Hann hrósaði þjálfarateymi sínu einnig í hástert.
,,Þjálfarateymið okkar er ótrúlegt, hvernig þau taka eftir litlu hlutunum, undirbúa æfingar, ég gæti ekki beðið um neitt meira.“
Man Utd mætir Atalanta í Meistaradeild Evrópu á morgun og á svo leik gegn Liverpool í ensku úrvalsdeildinni á sunnudag.
Það má ætla að komandi vika gæti haft mikið að segja hvað varðar framtíð Solskjær í Manchester.
