Síðasti þáttur útvarpsþáttarins Harmageddon á X-inu 97.7 er nú í loftinu og klárast klukkan 12:00. Þetta staðfesti Frosti Logason í samtali við blaðamann DV í gær og má því með sanni segja að í hádeginu í dag ljúki ákveðnu skeiði í íslenskri útvarps- og fjölmiðlasögu.

Þátturinn hefur verið í gangi í 14 ár og margt gengið á þeim tíma, segir Frosti. Nú hverfa þeir báðir til annarra starfa, en munu þó ekki slíta á strenginn við Sýn. Frosti hefur undanfarin misseri látið að sér kveða í Íslandi í dag á Stöð 2 og vakið þar athygli. Nú síðast fyrir umfjöllun sína um samtökin Hugarafl.

Herma heimildir DV að Máni ætli að halda sér innan ramma umræðuþáttanna, en næsta verkefni hans hefur þó ekki verið tilkynnt formlega.

Í samtali við DV sagði Frosti að ákvörðunin hafi í raun verið tekin fyrir löngu um að klára þessar kosningar og benti Frosti á að þetta væru fimmtu Alþingiskosningarnar sem þeir félagar tækla í þættinum.

Í stað Harmageddon með Frosta og Mána mun fjölmiðlamaðurinn Tómas Steindórsson taka við keflinu, einn til að byrja með. Í samtali við Fréttablaðið segir Frosti að hann og Máni hafi handvalið arftakann og að þeir hafi mikla trú á honum.