Yves Bissouma leikmaður Brighton, nefndi sjálfan sig þegar hann var spurður hver væri besti miðjumaðurinn í ensku úrvalsdeildinni. Bissouma kom til Brighton frá Lille árið 2018 en fékk lítið að spila undir Chris Hughton.

Hann hefur hins vegar fengið aukin tækifæri eftir að Graham Potter tók við þjálfarastöðunni og fengið mikið lof fyrir frammistöður sínar en Man United, Liverpool og Arsenal eru öll sögð hafa áhuga á Malímanninum.

„Ég vil ekki vera hrokafullur, en það er ég vegna þess að í huganum er ég að vinna að því að vera bestur,“ sagði Bissouma þegar að Glenn Murray, fyrrum leikmaður Brighton spurði hann hver væri besti miðjumaðurinn í deildinni að hans mati.

„Ég get ekki nefnt annan á nafn, ég veit að það eru margir góðir miðjumenn í deildinni, en í mínum augum er það ég vegna þess að það gefur mér sjálfstraustið og orkuna til að leggja hart að mér og sýna fólki að ég sé hér og ég er Bissouma. 

Ég vil bara einbeita mér að fótbolta, spila hvern einasta leik og hjálpa liðinu að vinna og við sjáum til með rest.“

Bissouma sagði einnig að Brighton hefði það að markmiði að enda í einum af tíu efstu sætunum í lok leiktíðar. „Við viljum enda í einum af topp tíu efstu sætunum. Ég held að við getum endað þar eða jafnvel aðeins ofar. Svo við verðum bara að vinna að því.“