Margir velta því nú fyrir sér hvort starf Heimis Guðjónssonar þjálfara Vals sé í hættu. Valur hefur misst flugið í deildinni og tapið gegn Vestra í bikarnum í gær vakti mikla undrun. Það að Valur hafi tapað gegn liði úr Lengjudeildinni á þessum tímapunkti setur af stað kjaftasögur um allan bæ.

Valur hefur haft mikla yfirburði í íslenskum fótbolta á síðustu árum. Frá árinu 2015 hefur Valur þrisvar orðið Íslandsmeistari og í tvígang bikarmeistari.

Sumarið 2019 var þungt fyrir Val og að því loknu var ákveðið að láta Ólaf Jóhannesson fara úr starfi. Hafði hann unnið fjóra titla á fjórum árum þar á undan. Heimir Guðjónsson tók við starfinu og gerði Val að Íslandsmeisturum í fyrra.

Sumarið í ár hefur verið erfitt fyri Val. Þrátt fyrir að hafa verið á toppi efstu deildar eftir 16 umferðir, hefur spilamennska liðsins ekki verið ýkja merkileg stærstan hluta sumarsins.

Valur hefur skorað 30 mörk sem er minna en FH, Víkingur, KR og Breiðablik hafa gert. Valur hefur fengið á sig 22 mörk sem er meira en Breiðablik, Víkingur, KR og KA hafa fengið á sig.

Liðið steig stórt skref fyrir tímabilið þegar liðið æfði eins og atvinnumenn í aðdraganda mótsins, leikmenn voru á svæðinu allan daginn og æfðu af krafti. Það hefur ekki borið árangur.  Valur er með vel mannað lið og líklega það dýrasta í íslenskum fótbolta.

Framtíð Heimis er því rædd þessa dagana. Orðrómur hefur verið á kreiki um að breytingar verði í þjálfarateymi Vals um nokkurt skeið. Talað hefur verið um að Heimir fái nýja aðstoðarmenn til að reyna að hrista upp í hlutunum. Óvíst er hins vegar hvað gerist.

Ekki náðist í Börk Edvardsson formann knattspyrnudeildar Vals við vinnslu fréttarinnar.