Young Boys gerði sér lítið fyrir og sigraði Manchester United í fyrsta leik liðanna í F-riðli Meistaradeildar Evrópu í gær. Leikið var í Sviss. Gestirnir léku vel fyrstu mínútur leiksins. Þeir komust yfir á 13. mínútu þegar Cristiano Ronaldo kom boltanum í netið eftir frábæra sendingu inn fyrir frá Bruno Ferndandes.
Á 35. mínútu breyttist leikurinn mikið. Þá fékk Aaron Wan-Bissaka, bakvörður Man Utd, beint rautt spjald fyrir klaufalega tæklingu á Christopher Martins. Gestirnir frá Manchester fóru þó með 0-1 forystu inn í hálfleikinn.
Manni fleiri voru Young Boys betri í seinni hálfleik. Nicolas Moumi Ngamaleu skoraði verðskuldað jöfnunarmark fyrir þá á 66. mínútu. Hann stýrði þá fyrirgjöf Silvan Hefti í netið. Heimamenn voru líklegri aðilinn til að finna sigurmark leiksins. Það kom svo á fimmtu mínútu uppbótartímans. Þá átti varamaðurinn Jesse Lingard hræðilega sendingu til baka sem Jordan Siebatcheu komst inn í og skoraði. Lokatölur 2-1.
United átti aðeins tvö skot að marki Young Boys en bæði fóru á markið, hefur liðið ekki átt svona fá skot í Meistaradeildinni í 138 leikjum.
Það þarf að fara aftur til ársins 2004 til að finna jafn slaka tölfræði í skotum að marki. Ítarleg tölfræði úr leiknum er hér að neðan.
