Það er krísuástand á Hlíðarenda en karlalið Vals í fimmta sæti og er átta stigum á eftir toppliði Breiðabliks. Það er því ljóst að Valur nær ekki að verja titilinn. Valur mætti til leiks í mótið með best mannaða liðið að mati sérfræðinga og var spáð sigri af flestum.

Eftir 16 umferðir var Valur á toppi deildarinnar en algjört hrun hefur orðið á Hlíðarenda á síðustu vikum. Liðið tapaði 3-0 gegn Blikum á útivelli í síðustu umferð.

„Ég er ekki alveg laus við pirringinn,“ sagði Benedikt Bóas Hinriksson blaðamaður á Fréttablaðinu í sjónvarpsþætti 433 á Hringbraut í gær.

„Á þriðjudagsmorgni er ég að skoða mörkin þá rifjaðist allur þessi pirringur upp. Þyngsli í þessu, mér líður illa. Það er ekki hægt að orða það neitt öðruvísi.“

Benedikt segir að Valur hafi aldrei átt séns gegn frískum Blikum. „Þetta var leikur kattarins að músinni. Ferskir ungir og graðir karlar á móti gömlum körlum. Ég gat ekki séð það að liðið hefði verið í tíu daga æfingabúðum að fara yfir hluti, ég set stórt spurningarmerki hvað var gert í þessu landsleikjafríi.“

Eins og fyrr segir var Valur á toppi deildarinnar þegar langt var liðið á mótið. Hvað gerðist svo? „Ég átta mig ekki á því hvar þetta hrynur, í raun lifðu þeir á lyginni framan af móti. Við ræddum það um miðbik móts að það yrði skrýtið að vinna deildina með 22 mörk skoruð. Það voru allir að bíða eftir því að 5 eða 6 gírinn kæmi en þetta fór í hlutlausan. Eitthvað hefur gerst sem orsakar þessu rosalega þyngsli í hópnum,“ sagði Benedikt.

Meiri umræðu Val og annað má sjá hér að neðan.