Við Skorradalsvatn í landi Hvamms stendur hús á 3400 fermetra eignarlóð. Húsið er nú til sölu og óhætt er að segja að auglýsing fasteignasölunnar Fasteignaland hafi vakið mikla athygli. Eignin var skráð í þessari viku en þegar hafa yfir átta þúsund flett auglýsingunni upp á söluvef Vísis.
Ekki er bara um að ræða 120 fermetra sumarhús, á einum eftirsóttasta sumarhúsastað landsins, heldur er hönnun hússins athyglisverð. Húsið er reist 2010, að því er segir í auglýsingunni, og er reist á steyptri plötu og klætt að utan með ítölskum náttúrusteini. Þar innan eru þrjú rúmgóð svefnherbergi, forstofa, baðherbergi, eldhús/stofa/borðstofa í einu rými með arinstæði og gólfsíða glugga sem opnast út yfir vatnið og ægifögur fjöllin við Borgarfjörð. Gólfhiti er í öllu húsinu og sjálfvirk stýring á ljósum úti. Búið er að steypa grunn fyrir gufubað úti.
Baðherberginu fylgir þá „walk-in“ sturta og eru fataskápar inni í öllum svefnherbergjum.
En það er kannski ekki lýsingin og stærð fataskápa, þó það sé allt saman í toppstandi, sem vakið hefur athygli netverja. Á gólfinu má þá sjá glitta í ísbjörn, hvorki meira né minna. Ekki kemur fram hvort feldurinn sé „ekta“ eður ei, en af safni uppstoppaðra dýra á veggnum má gera ráð fyrir að eigandinn sé áhugamaður um skotveiði. Myndirnar hafa hið minnsta skapað miklar umræður meðal áhugasamra og ekki nema von að einn varpi spurningunni fram: „Er þetta alvöru ísbjörn á gólfinu?“
Myndirnar segja þó meira en þúsund orð, en þær eru hér fengnar að láni frá fasteignasölunni Fasteignaland. Nánari upplýsingar má sjá á fasteignaauglýsingunni, hér.
