Það vakti athygli fólks sem fór að eldgosinu í gær að hárið á fólki stóð upp í loft. Nú hefur komið í ljós að ef þetta gerist á fólk að forða sér af svæðinu og helst á það að fara inn í bílinn sinn.

„Fór aftur upp að gosinu í kvöld. Þetta er orðið algjörlega mindblowing dæmi,“ sagði íslenskur Twitter-notandi að nafni Haukur Heiðar á Twitter-síðu sinni í gær. Haukur ávarpaði svo Sævar Helga Bragason, jarðfræðinginn og vísindamiðlarann sem betur er þekktur sem Stjörnu-Sævar.

„Getur þú útskýrt afhverju hárið á öllum stóð upp í loftið, jafnvel þótt það rigndi duglega?“ spurði Haukur. Fyrir neðan birtist svo mynd af konu við eldstöðvarnar en á myndinni má sjá hvernig hárið stendur upp í loftið. Myndina sem um ræðir má sjá í færslunni hér fyrir neðan.

Við sjáum mynd – ansi margir voru með þessa hárgreiðslu við gosið pic.twitter.com/GZU05ATJda

— Guðbjörg Þorsteinsd (@gubjug) May 20, 2021

Sævar var fljótur að svara en hann bað um aðstoð veðurfræðings. „Jahá! Stöðurafmagn í loftinu og hætta á eldingum á svæðinu. Ég þarf veðurfræðing sem lærði á frægu eldingasvæði í þetta,“ sagði Sævar og ávarpaði Elínu Jónasdóttur sem svaraði innan skamms með áríðandi upplýsingum til fólks.

Elín benti á að þetta væru hættulegar aðstæður og að fólk eigi að forða sér af svæðinu ef þetta kemur fyrir.

„Já þarna er greinilega mjög hlaðið andrúmsloft, væntanlega vegna skúra klakanna sem mynduðust yfir svæðinu í dag, hefur ekkert með eldgosið að gera (nema ef hraunbreiðan jók á uppstreymið sem er líklegt). Það á að forða sér úr þessum aðstæðum niður á lægra svæði, helst inn í bíl,“ segir Elín.

Ljóst er að þessar upplýsingar skjóta einhverjum skelk í bringu. „Guð, ef ég hefði verið þarna með þessa vitneskju, þá hefði ég líklegast farið að gráta,“ segir til að mynda einn Twitter-notandi í athugasemd við færslu Elínar.