Sevilla sigraði Atletico Madrid í lokaleik dagsins í spænsku La Liga. Úrslitin þýða að meiri spenna er komin í toppbaráttuna á Spáni. Í leik Cadiz og Valencia gengu leikmenn af velli vegna kynþáttafordóma.
Sevilla var betri aðilinn í fyrri hálfleik. Þeir fengu víti strax á 6.mínútu en þá sá Jan Oblak við Lucas Ocampos af punktinum. Það var markalaust í hálfleik.
Á 70.mínútu kom Marcos Acuna Sevilla yfir eftir sendingu frá Jesus Navas. Atleti gerði atlögu að marki Sevilla á lokakafla leiksins en náðu ekki að skora. Sigur heimaliðsins staðreynd.
Real Madrid og Barcelona eru nú farin að anda hressilega ofan í hálsmálið á Atleti. Sevilla er í 4.sæti, með gott forskot á næstu lið á eftir.
Fyrr í dag sigraði Cadiz Valencia. Liðin sigla bæði lignan sjó um miðja deild. Juan Cala skoraði fyrsta mark leiksins og kom Cadiz yfir. Kevin Gameiro jafnaði fyrir Valencia aðeins fimm mínútum seinna. Staðan í hálfleik var 1-1. Sigurmarkið kom svo í blálokin. Þar var að verki Marcos Mauro, hann tryggði heimamönnum í Cadiz 2-1 sigur.
Það sem vakti helst athygli í þessum leik tengdist þó ekki knattspyrnu. Leikmenn Valencia gengu þá af velli í kjölfar þess að talið hafði verið að Mouctar Diakhaby hafi orðið fyrir kynþáttafordómum. Leikurinn hélt þó áfram eftir stutt hlé. Diakhaby var skipt út af.
