Manchester United tók á móti Brighton í síðasta leik dagsins í ensku úrvalsdeildinni. Þeir lentu í kröppum dansi en tókst að lokum að sigra leikinn.
Man Utd stjórnaði leiknum fyrstu 10 mínúturnar eða svo en það var þó Brighton sem komst yfir. Þar var að verki fyrrum leikmaður United, Danny Welbeck. Paul Pogba tapaði boltanum á miðsvæðinu og gestirnir fóru í sókn sem endaði með því að Welbeck skoraði eftir frákast.
Heilt yfir slappur fyrri hálfleikur hjá United sem var undir í hálfleik.
Það var bjartara yfir heimamönnum í byrjun seinni hálfleiks en það vantaði upp á gæðin á síðasta þriðjungi.
Jöfnunarmarkið kom þó eftir rúmlega stundarfjórðung af síðari hálfleiknum. Marcus Rashford skoraði þá eftir stoðsendingu frá Bruno Fernandes.
Eftir markið var stígandi í leik United. Um rúmlega 20 mínútum eftir jöfnunarmark Rashford skoraði Mason Greenwood það sem reyndist vera sigurmarkið. Hann náði þá að koma sér í misheppnað skot Pogba og koma boltanum í netið.
Man Utd styrkti stöðu sína í 2.sæti deildarinnar með sigrinum. Brighton er í 16.sæti, 6 stigum fyrir ofan fallsæti.
