Sjö ökumenn voru handteknir á höfuðborgarsvæðinu í gærkvöldi og nótt, grunaðir um að vera undir áhrifum áfengis og/eða fíkniefna. Akstur konu var stöðvaður síðdegis í gær en hún reyndist vera svipt ökuréttindum og var um ítrekað brot að ræða hjá henni. Börn voru í bifreiðinni og var barnaverndaryfirvöldum því gert viðvart um málið. Tilkynnt var um innbrot í verslun í Breiðholti á fjórða tímanum í nótt, ekki liggur fyrir hverju var stolið.

Af þeim ökumönnum sem voru handteknir, grunaðir um að vera undir áhrifum áfengis og/eða fíkniefna reyndist einn vera eftirlýstur fyrir önnur brot og sviptur ökuréttindum. Hann var vistaður í fangageymslu.

Tveir til viðbótar reyndust vera sviptir ökuréttindum og var þetta ekki í fyrsta sinn sem þeir voru staðnir að akstri eftir að þeir voru sviptir ökuréttindum.

Einn ökumaður reyndist aldrei hafa öðlast ökuréttindi og er hann einnig grunaður um vörslu fíkniefna. Annar var einnig kærður fyrir of hraðan akstur og að hafa ekið án gildra ökuréttindi og sá þriðji var ekki með gild ökuréttindi.

Einn framvísaði fölsuðu ökuskírteini og var því einnig kærður fyrir skjalafals.