Ekið var á sex ára barn í umdæmi lögreglunnar á Suðurnesjum í vikunni. Var það á hlaupum yfir götu ásamt öðru barni þegar atvikið átti sér stað. Barnið var flutt til skoðunar á Heilbrigðisstofnun Suðurnesja og reyndist það ekki hafa slasast alvarlega.

Ökumaður sem lögregla tók úr umferð vegna gruns um akstur undir áhrifum fíkniefna var með ungt barn sitt í bifreiðinni. Sýnatökur á lögreglustöð staðfestu neyslu hans og var tilkynning send til barnaverndarnefndar.

Lögregla hafði í vikunni afskipti af karlmanni, sem staddur var fyrir utan verslun í Njarðvík, vegna gruns um brot á sóttvarnarlögum. Kvaðst hann vera hafa verið að koma frá París og væri að bíða eftir fari til Reykjavíkur. Honum var gerð grein fyrir því að hann hefði átt að fara rakleiðis í sóttkví og gæti átt von á sekt fyrir brot á sóttvarnarlögðum. Lögregla sá jafnframt til þess að hann fylgdi þeim fyrirmælum.

Þetta kom fram í dagbók Lögreglunnar á Suðurnesjum fyrir seinustu viku.