Thomas Tuchel, knattspyrnustjóri Chelsea er meðvitaður um gæðin sem Luis Suarez, sóknarmaður Atletico Madrid hefur. Chelsea mætir Atletico Madrid í 16-liða úrslitum Meistaradeildar Evrópu í kvöld.
Chelsea hefur gengið vel síðan að Tuchel tók við stjórnartaumunum á Stamford Bridge eftir að Frank Lampard var rekinn. Liðið er ósigrað í öllum sjö leikjum sínum undir stjórn Þjóðverjans.
Tuchel veit þó að Atletico Madrid er verðugur andstæðingur, liðið er á toppi spænsku úrvalsdeildarinnar um þessar mundir.
„Þetta er stór prófraun fyrir okkur. Þetta félag er með mikla reynslu í þessari keppni og er með reynslumikinn knattspyrnustjóra. Vonandi mun þetta draga fram það besta í okkur,“ sagði Thomas Tuchel á fréttamannafundi fyrir leikinn.
Luis Suarez hefur verið magnaður fyrir Atletico Madrid síðan að hann kom til liðsins frá Barcelona fyrir tímabilið. Hann er markahæsti leikmaður spænsku deildarinnar ásamt Lionel Messi.
„Hann er fæddur framherji. Hann er með sérstakt hugarfar sem framherjar hafa aðeins. Hugarfar þar sem vilji hans, áræðni og reiði til að skora blómstra, hann er aldrei sáttur,“ sagði Tuchel um Luis Suarez.
Leikur Atletico Madrid og Chelsea hefst klukkan 20.00 í kvöld.
