Gary Lineker, fyrrverandi landsliðsmaður Englands í knattspyrnu vill að Jamie Vardy verði valinn í landsliðshóp Englands fyrir Evrópumótið sem fer fram í sumar.

Vardy, sem er 34 ára gamall, hefur skorað 12 mörk í ensku úrvalsdeildinni á leiktíðinni og var meðal annars á skotskónum gegn Englandsmeisturum Liverpool um síðustu helgi.

Vardy lagði landsliðsskóna á hilluna árið 2018 eftir að hafa spilað 26 leiki fyrir enska landsliðið og skorað sjö mörk. Lineker vill hins vegar að Gareth Southgate reyni að fá hann aftur í enska landsliðið.

„Jamie Vardy færir þér eitthvað öðruvísi í leik liðsins vegna þess hversu góður hann er í að komast inn fyrir vörn andstæðingsins,“ sagði Lineker á Talksport.

Hann er hins vegar meðvitaður um að enska landsliðið hefur yfir mörgum góðum framherjum að velja um þessar mundir. Harry Kane, leikmaður Tottenham, Dominic Calvert Lewin, leikmaður Everton og Danny Ings, leikmaður Southampton hafa allir verið á flugi með sínum liðum á leiktíðinni.

„Þetta er í fyrsta skipti i nokkra áratugi sem við þurfum að skilja framúrskarandi leikmann eftir heima fyrir mótið og þetta mun reynast erfitt val fyrir Southgate,“ sagði Gary Lineker, fyrrum framherji enska landsliðsins.