Everton tók á móti Tottenham í 5. umferð enska bikarsins í kvöld. Boðið var upp ótrúlega skemmtun en leikurinn fór í framlengingu og endaði með 5-4 sigri Everton.
Gylfi Þór Sigurðsson, bar fyrirliðabandið í liði Everton og setti heldur betur sitt mark á leikinn með marki og þremur stoðsendingum.
Davinson Sánchez kom Tottenham yfir með fyrsta marki leiksins á 3. mínútu eftir stoðsendingu frá Heung-Min Son.
Þannig stóðu leikar allt þar til að Dominic Calvert Lewin jafnaði leikinn á 36. mínútu eftir stoðsendingu frá Gylfa Þór Sigurðssyni.
Richarlison kom Everton síðan yfir með marki tveimur mínútum síðar eftir stoðsendingu frá Dominic Calvert-Lewin.
Á 43. mínútu var röðin komin að Gylfa Þór sem skoraði þriðja mark Everton úr vítaspyrnu eftir að brotið hafði verið á Dominic Calvert-Lewin innan teigs.
Í uppbótartíma fyrri hálfleiks minnkaði Érik Lamela muninn fyrir Tottenham og stóðu leikar í hálfleik því 3-2 fyrir Everton.
Davinson Sánchez jafnaði leikinn fyrir Tottenham á 57. mínútu áður en að Richarlison kom Everton aftur yfir í leiknum með marki á 69. mínútu eftir stoðsendingu frá Gylfa Þór.
Mörkin hættu ekki að koma því að á 83. mínútu jafnaði Harry Kane leikinn fyrir Tottenham eftir stoðsendingu frá Heung-Min Son. Fleiri mörk voru ekki skoruð í venjulegum leiktíma og staðan orðin 4-4. Það þýddi að grípa þurfti til framlengingar.
Everton reyndist sterkari aðilinn í framlengingunni. Á 97. mínútu skoraði Bernard, fimmta mark Everton eftir hreint út sagt magnaðan undirbúning frá Gylfa Þór Sigurðssyni, þriðja stoðsending Gylfa í leiknum því staðreynd.
Fleiri mörk voru ekki skoruð í leiknum sem bauð upp á mikla skemmtun. Everton fer áfram í 8-liða úrslit keppninnar með 5-4 sigri á Tottenham sem er úr leik.
Everton 5 – 4 Tottenham (Eftir framlengingu)
0-1 Davinson Sánchez (‘3)
1-1 Dominic Calvert-Lewin (’36)
2-1 Richarlison (’38)
3-1 Gylfi Sigurðsson (’43, víti)
3-2 Érik Lamela (’45+3)
3-3 Davinson Sánchez (’57)
4-3 Richarlison (’69)
4-4 Harry Kane (’83)
5-4 Bernard (’97)
