„Trump-stuðningsmenn láta líka taka eftir sér í Sacramento,“ skrifar rithöfundurinn Illugi Jökulsson á Facebook og birtir myndir úr mótmælunum sem fóru fram vestanhafs í gær. Athygli vekur að mótmælandinn og Trump-stuðningsmaðurinn sem Illugi birtir mynd af er með íslenska fánann.
Mótmælin í gær, sem breyttust í óeirðir, beindust upphaflega gegn talningu á atkvæðum kjörmanna. Sáu mótmælendurnir þetta sem síðasta tækifæri sitt til þess að hafa áhrif á ferli sem leiðir að lokum til staðfestingar á kjöri Joe Biden til embættis forseta Bandaríkjanna.
Myndin sem Illugi birti á Facebook hefur vakið athygli en til að mynda hefur Hringbraut fjallað um myndina.
Sjá má mikla furðu í athugasemdunum við myndina. „Hvað er íslenski fáninn að gera þarna?!“ spyr kona nokkur í athugasemd. „Ha? Þetta er rosalegt. Þarfnast skýringa við,“ segir fjölmiðlamaðurinn Egill Helgason. „Væntanlega er þarna einhver íslenskur stuðningsmaður Donald Trump. Ég vona að hann endi í bandarísku fangelsi næstu áratugina,“ segir síðan maður nokkur.
Illugi birtir síðan aðra mynd af manninum í athugasemd undir færslunni sinni. „Þekkir einhver þetta gerpi? Er þetta íslenskt, eða bara einhver fáráður sem heldur að við séum æðri öðrum því við erum svo föl og langafar okkar sigldu á bátum til Grænlands?“ spyr maður nokkur þá.
„Greyið ræfillinn öskrar og hörfar svo strax aftur i hópinn. Hræddur lítinn drengur,“ segir svo annar.
