Hörð viðbrögð á samfélagsmiðlum – Kölluð „ljót og ógeðsleg“
Hin 19 ára gamla Maisie Beech vildi sýna fram á hversu mikið er hægt að umbreyta útlitinu með hjálp snyrtivara og birti því ljósmynd af sér á netinu þar sem helmingur andlitsins er án farða og hinn helmingurinn stífmálaður. Óhætt er að segja að henni hafi tekist ætlunarverk sitt en viðbrögðin við myndinni komu henni í opna skjöldu.
Eftir að bróðir Maisie sá hana farða sig einn morguninn og minntist á hversu mikil útlitsbreytingin væri ákvað hún að deila því með heiminum. Segir hún í samtali við MailOnline: „Ég vildi sýna fólki að ég farða mig fyrir sjálfa mig og engan annan. Ég á líka alveg jafn auðvelt með að ganga niður götuna ómáluð. Við eigum ekki þurfa að nota farða til að fela okkur eða blekkja fólk. Við málum okkur ekki fyrir annað fólk, heldur er það eitthvað sem við getum fyrir okkur sjálf.“
Vonaðist Maisie til þess að myndbirtingin myndi fá aðrar konur til að líða vel í eigin skinni en reyndin var sú að fljótlega eftir að hún birti myndina var henni deilt á hinum ýmsu samfélagsmiðlum og fljótlega fóru að hrúgast inn athugasemdir sem margar hverjar voru afar neikvæðar. Hefur fólk meðal annars sagt að hún sé „ljót,“ „ógeðsleg“ og „ógnvekjandi“ og þá hafa sumir sagt að að hún hljóti að vera albínói eða krabbameinssjúklingur. Þá sagði einn netverji að hann myndi kýla hana í andlitið ef hann vaknaði upp við hliðina á henni.
Maisie segist sjálf hafa brugðið þegar hún heyrði allar gagnrýnisraddirnar en hún neitar að láta á sig fá og segir að þær sýni svart á hvítu þær útlitskröfur sem settar eru á konur í dag. „Það á ekki að gagnrýna konur og kalla þær falskar eða ónáttúrulegar ef þær kjósa að farða sig, rétt eins og það á ekki úthrópa þær sem ljótar eða óaðalaðandi ef þær kjósa að sleppa því að farða sig.“
