Eins og skýrt var frá í morgun hefur Héraðsdómur Reykjavíkur vikið Lárusi Sigurði Lárussyni, lögmanni, úr starfi sem skiptastjóri þrotabús fasteignafélagsins Þóroddsstaða ehf. Lárus hefur nú ákveðið að biðjast lausnar sem formaður Menntasjóðs námsmanna en Lilja Alfreðsdóttir, menntamálaráðherra, skipaði hann í stjórnina í sumar.

Þetta kemur fram í yfirlýsingu frá Lárusi en hún fer hér á eftir í heild sinni:

Lárus Sigurður Lárusson lögmaður hefur beðist lausnar sem formaður Menntasjóðs námsmanna, vegna dóms sem féll í Héraðsdómi Reykjavíkur í liðinni viku og varðaði störf hans fyrir þrotabú fasteignafélagsins Þóroddsstaða ehf. Lárus Sigurður er ósammála niðurstöðu dómsins og kannar nú forsendur áfrýjunar. Hann telur mjög brýnt að deilumál vegna þrotabúsins hafi ekki áhrif á önnur störf sín, þ.m.t. vinnu hans fyrir Menntasjóð námsmanna.

,,Menntasjóður námsmanna er afar mikilvæg stofnun sem gegnir grundvallarhlutverki í samfélaginu. Því er brýnt að friður ríki um stjórn og starfsemi Menntasjóðsins og það góða starf sem þar er unnið fái að halda áfram án óþarfa gagnrýni. Ég hef af þessum sökum beðist lausnar sem formaður Menntasjóðs, og einnig undan öðrum trúnaðarstörfum mínum. Ég hef þegar tilkynnt Menntamálaráðherra þessa ákvörðun.“