42 einstaklingar greindust með Covid-19 í gær sem eru heldur færri en síðustu daga. Þetta kom fram í máli Þórólfs Guðnasonar sóttvarnalæknis á upplýsingafundi almannavarna rétt í þessu.

Þó sagði Þórólfur að ekki væri tímabært að fagna sigri enn sem komið er. Talsvert færri sýni voru tekin í gær og um helgina. „Það verður fróðlegt að sjá tölur í dag og næstu daga,“ sagði Þórólfur. Í gær voru rannsökuð 1300 sýni og voru 73% þeirra sem greindust í sóttkví við greiningu. „Það er ánægjulegt,“ sagði hann.

Þórólfur benti jafnframt á að hlutfall jákvæðra sjúklingasýna hafi verið um 5% í gær, sem er ívið hærra en verið hefur og hafa nú alls tæplega 1900 greinst í þessari þriðju bylgju sem hófst 15. september, samkvæmt skilgreiningu heilbrigðisyfirvalda. Um 1200 einstaklingar eru í einangrun í dag og eiga allir nema þrír þeirra lögheimili á höfuðborgarsvæðinu.

27 einstaklingar eru nú inniliggjandi, og þrír á gjörgæslu. Tveir eru í öndunarvél. Alls hafa nú 63 verið lagðir inn á spítala frá 15. september. Mikill fjöldi manna er í sóttkví, eða um þrjú þúsund manns.

Mikill fjöldi greindist á landamærum í gær, eða 22 einstaklingar. Kom fram á fundinum að allir þeir einstaklingar voru að koma með flugi frá Póllandi. Eru 20 af þeim 22 einstaklingum með íslenskar kennitölur, sagði Þórólfur, „en við vitum ekki mikið meira.“ Þá liggur ekki enn fyrir staðfesting á því hvort um sé að ræða virk smit, eða gömul. Mótefnamæling fer nú fram til að fá úr því skorið.

„Við erum á viðkvæmum tíma í faraldrinum, þó við séum að sjá niðursveiflu. Þá er engin ástæða til að slaka á þeim aðgerðum sem hafa verið í gangi og mikilvægt að halda áfram þeim takmörkunum sem hafa verið í gangi síðastliðnar tvær vikur þangað til við náum kúrfunni vel niður. Það er væntanlega eftir 2-3 vikur, eins og komið hefur fram í auglýsingum ráðuneytisins.